ثم لماذا لم يحبنا العالم ..

مش قادرة احدد مين اول شخص قال لم يعد يحبنا العالم بس قادرة اتخيل شعوره وقتها الي حد ما ..
و بعد شوية بحث مقدرتش أوصل لمين هو اول شخص قدر يعترف صراحة كدة ان العالم مبقاش بيحبه خالص تقريبا
google كل ما اسيرش علي الجملة فيه بيصمم يفكرنى بريحانة جبرى و تقريبا معتبر انها اول شخص يقول ان العالم لم يحبه
* ريحانة جبرى فتاة إيرانية دافعت عن نفسها ضدد محاولة اغتصاب و قتلت اللي حاول يغتصبها اصدر ضددها حكم بالاعدام
و نفذ الحكم فعلا بعد حبسها لمدة 6 سنوات ..ريحانة قبل اعدامها كتبت رسالة لوالدتها ترجمت لعدة لغات و انتشرت قصتها
الرسالة *

https://soundcloud.com/lama-dalbah/yoip4qzjsqlr

بشكل مبدئي فيه شوية أسئلة وجودية كتير لازم تتقال
هو العالم فعلا لم يعد يحبنا ؟! هل هو بطل يحبنا و لا من الأساس العالم محبناش من الأول و احنا توهمنا الموضوع ؟!
هل العالم بيحب حد أصلا ؟! مهو لو مبيحبش حد من الأساس يبقي اكيد مش هيحبنا
طيب هو مين العالم دة يا جماعة ؟! ممكن نروح نقنعه بنفسنا يمكن يحبنا ...

في الواقع يا جماعة هو العالم بالنسبة لينا هو مجرد اشخاص ..الحقيقة اننا مش هيفرق معانا كتير هل 7 مليار كلهم بيحبونا و لا
لكن يفرق معانا جدا كل شخص بنبادله الحب سواء بابا او ماما او اصحبنا او ...و نضيف علي كدة كمان الداخلية و القضاء و الجيش
هما كمان لازم يسبونا في حالنا علشان منلاقيش نفسنا في نفس وضع ريحانه
بكل صدق و بغض النظر عن الناس اللي ذكرتهم فوق و قولت انهم لازم يشيلونا من دماغهم علشان نحس ان العالم بيحبنا
احنا عمرنا ما هنحس بالرضا و حب العالم غير لو كنا بنحب و نحترم و نفسنا بشكل كافي
احنا مش هنعرف نشوف الحب و الرضا غير لو هما نابعين أساسا من جوانا
مفيش اى منطق يخيلينى احب الناس زيادة عن ما احب نفسي او افنى نفسي في علاقات كتير
كل الناس مسيرها الزوال ..الحقيقة اللي بنحاول نهرب منها هي ان الزوال هي القاعدة الثابتة في الحياة
احنا نفسنا هنختفي و نتلاشي تحت التراب عاجلا او اجلا
ازاى بنتصور ان العلاقات مش هتختفي
علي فكرة اشعورك الدائم ان العالم لم يحبك دة عرض لسبب مهم هو انك نفسك بطلت تحب نفسك و افنيت نفسك في العالم ...
يعنى هو العالم عمره ما هيحبنا ؟ طيب خلاص احنا هنحب نفسنا ...